اهلا بيكم بصم بئ انا من اشد المعجبين بالشعر العامى
واذا ذكر هذا النوع من الاشعار لازم نذكر الابنودى
حبيب قلبى بموت فيه علشان كده جبتكلم حاجه جامده بجد ليه
وهيه جوابات الاسطى حراجى القط العامل فى السد العالى
لزوجته فاطنه
يــــــــــــارب تعجبكم زى ما عجبتنى
الرسالة الأولي
على غلاف الرسالة يوجد هذا العنوان :
الجوهرة المصونه
والدره المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلايه الفار
الرسالة :
أما بعد ..
لذا كنت هاودت كسوفي ع التأخير
واللهي ما كنت حاخط بيدي حرف.
سامحيني يا فطنه في طول الغيبه عليكم
وأنا خجلان .. خجلان ..
وأقولك يا زوجتنا
أنا خجلان منكم ..
من هنا للصبح ..
شهرين دلوقت ..
من يوم ما عنيكي يا فاطنه .
بلت شباك القطر ..
لسوعتي بدمعك ضهر يديَ
لحضتها قلت لك :
(( قبل ما عوصل عتلاقي جوابي جي ... ))
نهنهتي .. وقلتي لي بعتاب:
(( النبي عارفاك كداب ..
نساي
وعتنسى أول ما عتنزل في أسوان .. ))
ما عرفت ساعتها يا مرتي أضحك ولا أبكي.
ما عرفت ساعتها اذا كنت باعوز القطر يقف ولا يولي.
حسيت بعنيكي الحيرانة يا فاطنة بتقولي
وتسكت
وتقولي.
حسيت واليد بتخطفها يد الجدعان
بالقلب ف جوفي ما عارف ان كان بردان .. دفيان
والبت عزيزه والواد عيد
قناديل في الجوف ..
زي ما بتضوي .. بتقيد ..
.......... والقطر إتحرك ..
وقليبي بيتنقل من يد لإيد .
والقطر بيصرخ ويدَودِو
اتدلدلت بوسطي من الشباك ..
( خذي بالـــــــــــــــــــــــــــــــك م الولد ..
راعي عزيزه وعيد )
والقطر صرخ ورمح لكإنه داس على بصّة نار ..
ولقطت الحس قريب .. قد ما كنتي بعيد :
(قلبي معاك يا حراجي هناك في أسوان ..)
...........................
ورميت نفسي وسط الجدعان ..
وبكيت ..
وبلدنا اللي كنا بنمشيها ف نص نهار
كان القطر في لحضه .. فاتها بمشوار .
سامحيني يا فطنه على التأخير ..
ولو الورقه يا بت الخال تكفي
لأعبي لك بحر النيل والله بكفيِ
كلام
وختاماً ليس ختام ..
بابعت لك ِ
ليكي ولناس الجبلايه
ولبتي عزيزه والواد عيد
ألف سلام
ملحوظة:
اكتبي ع لمظروف
أسوان
زوجي الغالي
لوسطى حراجي القط
العامل في السد العالي
*************
زوجك
الاوسطى حراجي
الرسالة الثانية
وهي رد من فاطمة على رسالة زوجها
الرسالة
زوجي حراجي ..
فوصلنا خطابك ..
شمينا فيه ريحة الأحباب .
ربنا ما يوري حد غياب ..
مش أول مره البسطاوي بيخطي عتبة الدار ؟؟
عمرنا يا حراجي ما جلنا جواب .
النبي ساعة مرزوق البسطاوي ما نده ..
كده زي ما كون ..
دقت في حشايا نار .
وكإن العمر بيصدق
بعد ما كان كداب .
اتأخرت مسافه كبيرة كبيرة علي
عارف فاطنه يا حراجي لاليها عايل .. ولا خي .
ليه تتأخر كده يا حراجي .. ؟
طب والنبي كأن ورقتك دي
أول قنديل يتهز ف جوف الدار .
أول ندعة ضو.
الدار من غيرك يا أيو عزيزه
هِــوّ .
وعزيزه وعيد ..
من غيرك يا حراجي
زي اليُتما في العيد .
الواد على صغره حاسس بالغربه والبعد .
ولا عاد حتى بيطلع يلعب في القمَارى مع الولِد .
اطلع وأخش ..
أطلع وأخش القاه .. غيمان
وكأنه محروق له دكان .
ويقوللي :
(( فين يامه أسوان .. ؟
وأبا سابنا ليه يا مه ؟
ما يمكن زعلان .. ؟ ))
شهرين يا بخيل ؟
ستين شمس وستين ليل ؟
النبي يا حراجي ما أطول قلبك
لاقطع بسناني الحته القاسيه فيه.
..........................
كل الجبلايه تسلم فرداً فرد ..
م الحاج ((( طِلب حامد )) لعيلة بيت (( علي سعد ))
وانشالله تكون يا حراجي ما يوريني فيك يوم.
وانشالله تكون تعلمت ترد قوام .
ومادام احنا رسينا ع العنوان
والله ما حنبطل بعتان..
مفهوم:
أسوان
زوجي الغالي
لاوسطى حراجي القط ..
العامل في السد العالي
زوجتك
فاطنه أحمد عبد الغقار
جبلايه الفار
عدل سابقا من قبل sun_rise في الخميس مارس 19, 2009 3:55 pm عدل 1 مرات